លោក សូ ចាន់ណារី មេបញ្ជាការនគរបាលវរការពារព្រំដែនលេខ៩១១សំបួររឿងអាស្រូវពុករលួយជាច្រើនត្រូវបានលាតត្រដាង
03-March-2018 | ដោយ ពលមនសិការ
បន្ទាយមានជ័យ ៖ សេចក្តីរាយការណ៍ពីប្រជាពលរដ្ឋបានលួចបង្ហើបសារព័ត៌មានយើងថាលោក សូ ចាន់ណារី មេនគរបាលវរៈការពារព្រំដែនលេខ៩១១ ល្បីល្បាញយ៉ាង ខ្លាំងក្នុងការឃុបឃិតបើកដៃឲ្យឈ្មួញនាំចូលទំនិញគេចពន្ធ និងទំនិញខុសច្បាប់តាមច្រករបៀងជាច្រើនកន្លែងដើម្បីជាថ្នូរនឹងផលប្រយោជន៍។
លោក សូ ចាន់ណារី កំពុងល្បីល្បាញខាងនាំចូលរថយន្តចង្កូតស្ដាំពីទឹកដីថៃចូលទឹកដីកម្ពុជាស្រេចតែអំពើចិត្តតាមច្រករបៀងដែលខ្លួនគ្រប់គ្រង។
លោក សូ ចាន់ណារី ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីសំណាក់លោក អាត់ ខែម ស្នងការនគរបាលខេត្តបន្ទាយមានជ័យផងដែរ។ ប្រសិនបើគ្មានការឃុបឃិតជាប្រព័ន្ធទេ គឺលោក សូ ចាន់ណារី មេបញ្ជាការនគរបាលវរៈការពារព្រំដែនលេខ៩១១ មិនហ៊ានធ្វើអ្វីៗស្រេចតែអំពើចិត្តដូចសព្វថ្ងៃនេះទេ ព្រោះអាចប្រឈមនឹងវិធានការពីថ្នាក់លើជាមិនខាន។
រឿងអាស្រូវពុករលួយរបស់លោក សូ ចាន់ណារី មេបញ្ជាការនគរបាលអង្គភាពវរៈការពារព្រំដែនលេខ៩១១ ក្នុងការរកស៊ីនាំចូលរថយន្តចង្កូតស្ដាំនិងឃុបឃិតឲ្យឈ្មួញនាំចូលទំនិញខុសច្បាប់ ទំនិញគេចពន្ធត្រូវបានបើកកកាយជាបន្តបន្ទាប់។ ក៏ប៉ុន្តែរហូតមកដល់ពេលនេះលោក អាត់ ខែម ស្នងការនគរបាលខេត្តបន្ទាយមានជ័យ និងលោក សួន បវរ អភិបាលខេត្តបន្ទាយមានជ័យ មិនទាន់ចាត់វិធានការទប់ស្កាត់នៅឡើយទេហើយបណ្ដោយឲ្យលោក សូ ចាន់ណារី ព្រមទាំងបក្ខពួកធ្វើអ្វីៗតាមអំពើចិត្ត។ ដូច្នេះហើយទើបលោក សូ ចាន់ណារី នៅតែប្រើអំណាចប្រព្រឹត្តអំពើពុករលួយ និងបន្តសកម្មភាពរកស៊ីនាំចូលរថយន្តចង្កូតស្ដាំ រថយន្តគេចពន្ធ ក៏ដូចជាឃុបឃិតឲ្យមន្ត្រីក្រោមឱវាទធ្វើអ្វីៗតាមអំពើចិត្ត។
ប្រភពពីសមត្ថកិច្ចពាក់ព័ន្ធបានឲ្យដឹងថា កាលពីថ្ងៃទី១៩ ខែកុម្ភៈ ឆ្នាំ២០១៨ មន្ត្រីគយក្រុងប៉ោយប៉ែត បានចាប់រថយន្តគេចពន្ធ១គ្រឿងម៉ាកតូយូតាហ៊ីលុច្សរីវ៉ូ ស៊េរីឆ្នាំ២០១៧ ១គ្រឿងយកទៅទុកនៅស្នាក់ការគយក្រុងប៉ោយប៉ែត។ ក៏ប៉ុន្តែសមត្ថកិច្ចគយចាប់រថយន្តគេចពន្ធនោះបានតែមួយស្របក់ក៏ដោះលែងវិញ ក្រោយពេលដឹងថារថយន្តគេចពន្ធនោះជារបស់លោកវរសេនីយ៍ឯក សូ ចាន់ណារី មេបញ្ជាការនគរបាលវរៈការពារព្រំដែនលេខ៩១១។ ប្រភពខ្លះបានឲ្យដឹងថាលោក សូ ចាន់ណារី បានទិញរថយន្តពីស្រុកសៀម១គ្រឿងម៉ាកហ្វ័រធូន ពាក់ស្លាកលេខថៃ ដើម្បីជារបាំងសម្រាប់ការនាំចូលរថយន្តចង្កូតស្ដាំនិងរថយន្តគេចពន្ធពីទឹកដីថៃចូលទឹកដីខ្មែរ។ តាមរយៈទង្វើបែបនេះលោក សូ ចាន់ណារី អាចរកប្រាក់ចំណេញពីការនាំចូលរថយន្តចង្កូតស្ដាំ និងរថយន្តគេចពន្ធ១គ្រឿងប្រមាណ៣ពាន់ដុល្លារ។
បើតាមការបង្ហើបពីមន្ត្រីនគរបាលតូចតាចនៅក្នុងអង្គភាពវរៈការពារព្រំដែនលេខ៩១១ បានឲ្យដឹងថា លោក សូ ចាន់ណារី តែងតែដោះដូរស្លាកលេខថៃពីរថយន្តស្របច្បាប់របស់គាត់ទៅបំពាក់លើរថយន្តគេចពន្ធ ហើយបើកពីទឹកដីថៃចូលទឹកដីខ្មែរតាមច្រករបៀងដែលគ្របគ្រងដោយវរនគរបាលការពារព្រំដែនលេខ៩១១។
ប្រភពបានឲ្យដឹងទៀតថា ថ្ងៃខ្លះលោក សូ ចាន់ណារី នាំចូលរថយន្តចង្កូតស្ដាំពីទឹកដីសៀមចូលទឹកដីខ្មែរពី៣គ្រឿងដល់៥គ្រឿង ហើយក្នុង១គ្រឿងអាចចំណេញលុយពី៣០០០ដុល្លារទៅ៥០០០ដុល្លារយ៉ាងស្រួលៗតែម្តង។ ករណីមន្ត្រីគយចាប់រថយន្តគេចពន្ធរបស់លោក សូ ចាន់ណារី ១គ្រឿងកាលពីថ្ងៃទី១៩ ខែកុម្ភៈ ឆ្នាំ២០១៨ ប្រហែលដោយសារលោក សូ ចាន់ណារី ចង់ស៊ីដាច់មន្ត្រីគយ ក៏ប៉ុន្តែក្រោយមានការសម្របសម្រួលទើបរថយន្តគេចពន្ធនោះត្រូវបានដោះលែងវិញភ្លាមៗ។ បញ្ហានេះគឺជារឿងដែលនាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរមើលរំលងតទៅទៀតទេ ព្រោះសេចក្ដីរាយការណ៍ខ្លះបានឲ្យដឹងថា ការដែលលោក សូ ចាន់ណារី អាចធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់មន្ត្រីធំៗក្នុងខេត្តបន្ទាយមានជ័យដែលល្បីល្បាញខាងពុករលួយជាយូរមកហើយ។
ជាងនេះទៅទៀតការដែលលោក សូ ចាន់ណារី អាចនាំចូលរថយន្តគេចពន្ធនិងរថយន្តចង្កូតស្ដាំក្នុង១ខែៗជាច្រើនគ្រឿង គឺមានការឃុបឃិតជាមួយមន្ត្រីគយនិងសមត្ថកិច្ចពាក់ព័ន្ធដទៃទៀតផងដែរ ទើបអ្វីៗអាចប្រព្រឹត្តទៅដោយយ៉ាងរលូន៕
ចំនួនអ្នកទស្សនា
- ថ្ងៃនេះ8731
- ម្សិលមិញ10851
- សប្តាហ៍នេះ75251
- ខែនេះ190401
- ឆ្នាំនេះ190401
- សរុប20632857